Kreu i PD-së Sali Berisha dhe ai Partisë së Lirisë, Ilir Meta, firmosën këtë të enjte marrëveshjen e përbashkët për zgjedhjet lokale, që do të mbahen në 14 maj të 2023. Ish-kryetarja e Kuvendit, Jozefina Topalli, ka folur për procesin e primareve në PD që do t’i paraprijnë zgjedhjeve të 14 majit.
Në studion e emisionit “Të Paekspozuarit”, në MCN tv, Topalli shprehu dyshime nëse ato do të nxjerrin kandidatët më të mirë.
“PD, hiq pjesën kur drejtohej nga Basha, kandidatët përcaktoheshin duke marrë mendime nga baza, nga kryesia, etj. Kjo është një mënyrë e re.
Është ushtrim demokracie. Nuk jam e sigurtë a do të dalë produkti më i mirë, por njeriu nuk ka pse mos të guxojë. Mendoj se ndoshta duhet të kishte disa kritere.
Për shembull nëse do të punosh në administratë, kërkohet CV, etj. Por, është ushtrim demokracie i mirë.
Ne kemi qëllim të marrim bashki, sepse jemi me zero. Uroj që primaret të ecin paralelisht me këtë qëllim.
Po të më pyesësh për institucionin e Presidentit, mendoj se duhet të jetë politik. Për kryetarin e Bashkisë, duhet person me aftësi menaxhuese”, është shprehur Topalli.
