Kreu i Bindjes Demokratike, Astrit Patozi, është shprehur i hapur për të bashkëpunuar me PD-në pas zgjedhjeve të 25 prillit. Ai ka thënë mjaft qartë se do të pranonte një koalicion pas zgjedhor me PD-në, nëse kjo do të shërbente për të larguar Ramën nga pushteti. Në një intervistë për “Report TV”, Patozi tha se ky bashkëpunim do të vinte nëse do e kërkonin qytetarët, por duke parashtruar kushtet e tyre.
“Ne do të bashkëpunojmë vetëm në rast se populli shqiptar do të na e kërkojë këtë, dhe në rast se PD-ja do të pranojnë kushtet tona. Kaq e thjeshtë është. Sigurisht që ky bashkëpunim nuk mund të ndodhë para zgjedhjeve, nuk ka asnjë shans për këtë”, deklaroi ai.
Patozi citoi më tej se Bindja Demokratike po bën të gjitha përpjekjet, për të pasur një rezultat sa më dinjitoz në këto zgjedhje. Duke mos bërë disa kalkulime elektorale, ai shtoi më tej se po punon për të qenë forcë përcaktuese qeverisëse.
“Se sa mandate do të fitojë Bindja Demokratike, nuk di ta them, sepse nuk e kam mbajtur veten as për profet dhe as për fallxhor. Di të them vetëm që po bëjmë të gjitha përpjekjet tona, për të pasur një rezultat sa më dinjitoz në këto zgjedhje. Dhe ne synojmë të jemi forcë përcaktuese qeverisëse”, u shpreh Astrit Patozi.
Për të sjellë ndryshim, jo vetëm rotacion, diskutimet me partitë e tjera vijojnë. “Me partitë e reja të tjera që e mendojnë Shqipërinë si ne, jemi të detyruar të garojmë së bashku sepse e para kemi kauzën e përbashkët, dhe e dyta sepse interesat elektorale i kemi të përbashkëta. Pasi nëse do garonim veçantë ‘dinozaurët’ e mëdhenj të politikës, do e kishin më të lehtë të na shqyenin”, thotë Patozi.
