Presidenti Ilir Meta zhvilloi sot një takim me kreun e PD-së, Lulzim Basha, i cili zgjati rreth 50 minuta.
Në fokus të takimit ishin ndryshimet kushtetuese për heqjen e koalicioneve parazgjedhore dhe hapjen e pjesshme të listave.
Kreu i shtetit e ka falënderuar Bashën për bashkëpunimin gjatë periudhës së pandemisë dhe pjesëmarrjen konstruktive në mbledhjen e Këshillit të Sigurisë Kombëtare dhe mos rënien pre për largimin nga tryeza politike pas shembjes së Teatrit Kombëtar.
“Do kërkoja nga ju që t’i qëndronit me besnikëri marrëveshjes së firmosur me përfaqësuesit e mazhorancës dhe të ruani qetësinë dhe në këto momente kur ka përpjekje për të cenuar rëndë Kushtetutën e vendit në mënyrë kriminale dhe për të shkatërruar çdo lloj legjitimiteti të institucioneve në vend”, tha Meta.
Sipas tij, kjo është edhe arsyeja e kërkesës për takim, “pas kërkesës suaj para dy ditësh ku parashtruat shqetësimet tuaja”.
“Keni rol të rëndësishëm me qetësi dhe përgjegjshmërinë tuaj për të bashkëpunuar edhe me partneret evropianë dhe botën demokratike se e kam theksuar se gjatë tensioneve artificiale në vendin tonë, se konfliktet në Shqipëri s’janë të rastësishme, jini te vetëpërmbajtur. E rëndësishme është të mos bëjmë aventurë me Kushtetutën”, mësohet të ketë thënë Meta.
Nga ana tjetër, Basha ka akuzuar qeverinë për dy akte të paprecedente, duke thyer një marrëveshje të arritur me bekim ndërkombëtar që normalizoi klimën në vend.
“Në arritëm një marrëveshje që u përshëndet nga faktori ndërkombëtar. Koha ishte esenciale. Nëse këto ndryshime ndodhin, ne do të jemi vendi i dyte, pas Rusisë qe ndodhin ndryshime ne kohe pandemie, fature që do të jetë shume e rendë”, tha ai.
