Zv.kryeministri, Erion Braçe i shoqëruar nga drejtoresha e tatimeve, Delina Ibrahimaj, kanë inspektuar një nga pikat e karburantit në zonën e Brrylit.
Braçe deklaroi se vendosja e kompanive të karburanteve në shënjestrën e administratës tatimore, ka ardhur pas një investigimi të kryer nga hetimi tatimor gjatë muajve të fundit, ku u vërejt një evazion i lartë fiskal në këtë sektor.
“25 ditët e shkuara është zhvilluar një kontroll në tregun e karburanteve kryesisht në zonën Elbasan-Tiranë-Durrës dhe ku për fat të keq ne kemi gjetur evazion fiskalë dhe veprimtari kriminale të organizuar. Për këtë arsye struktura e Hetimit Tatimorë kanë kallzuar në prokurorinë e Elbasanit këtë aktivitet kriminal dhe për këtë arsye janë vënë në pranga personat përgjegjës të një kompanie që manipulonte kasat fiskale”, u shpreh Braçe.
Zv.kryeministri u bëri thirrje të gjithë subjekteve që ushtrojnë aktivitetin në tregun e karburanteve dhe jo vetëm, që të jenë në rregull me ligjin.
“Të jenë në rregull me ligjin, të mos i bien telefonit të askujt nëse nuk janë në rregull me ligjin. Nuk i hapet telefoni, mund ti hapet telefoni por nuk e ndihmon kërkush deri në momentin që do të kthehet në ligjshmëri”, vijoi më tej Braçe.
Erion Braçe bëri me dije se një sasi e konsiderueshme karburanti i është bllokuar një kompanie të madhe në vend. Ai nuk përmendi emër por tha se do të ketë zero tolerancë.
“Vetëm 8 ditëve të shkuara një prej kompanive më të mëdha të karburanteve në vend i është bllokuar një sasi e konsiderueshme xhetfyelli që ishte jashtë parametrave të squfurit që përmbante. Kjo histori ka filluar dhe nuk mbaron, do rri lart dhe nuk do lëvizi nga aty ku është”, tha Braçe.
