Këngëtarja e njohur, Besa Kokëdhima, bën me dije se do të tërhiqet nga gara e “Këngës Magjike”.
Përmes një postimi në Facebook, Besa shprehet se arsyeja e largimit nga ky kompeticion, ka të bëjë me tragjedinë e 26 nëntorit. Ajo thotë se nuk mundet dot të këndojë kur vendi dhe populli po vuan në këtë tragjedi natyrore.
“Të dashur miq, me keqardhje ju njoftoj se në këtë kohë tragjedie, pikëllimi dhe paniku, e kam të pamundur të performoj dt 5 – 7 Dhjetor ne Kënga Magjike 2019. Zemra ime është e ngarkuar me dëshpërim dhe vuajtje për ata që nuk janë më, dhe nuk jam në gjendje të këndoj kur me bashkëkombësit e mi ka ndodhur kaq shumë; ndaj më duhet të tërhiqem zyrtarisht nga Kënga Magjike 2019! Jam e bindur që Kënga Magjike do bëjë një punë të lavdërueshme për të kontribuar në mënyrën e saj për të ndihmuar të prekurit, unë do jap në heshtje ndihmën dhe kontributin tim për të lehtësuar sado pak dhimbjen e tyre, dhe respektuar humbjet e pashlyeshme të tyre. Kërkoj ndjesë fansave të mi të cilët prisnin performimin tim dhe falenderoj organizatoret dhe @arditgjebrea për gjithçka kanë bërë për mua dhe kolegët e mi!”, shkruan këngëtarja në Facebook.
Mirëpo menjëherë pas këtij njoftimi ka ardhur reagimi i drejtuesit të këtij spektakli, Ardit Gjebreas.
Moderatori shprehet në koment se këtë vit ‘Kënga Magjike’ do të vijë me një kauz dhe misioni i saj do të jetë, ‘këndoj për të ndërtuar’. Gjebrea i ka bërë thirrje Besës që ti bashkohet nismës së bashku me të gjithë artistët pjesëmarrës për të dhënë kontributin e tyre për të ndërtuar.
Ai u shpreh se ka vendosur që me të ardhurat që do të mblidhen nga biletat, do të ndërtojnë një shtëpi të re nga e para.
