Një telefonatë është bërë shkas që dy vëllezërit e ndjerë Olldashi, të dilnin nga banesa e tyre në Pogradec në datën 7 dhjetor. Në të njëjtën ditë, ata nuk kanë humbur kontaktet dhe nuk janë kthyer më në banesë.
Uniformat blu kanë sekuestruar disa telefona, përfshi edhe të të njohurve të tyre. Dyshohet se vëllezërit janë marrë në një makinë më 7 dhjetor, me të cilën kanë udhëtuar deri tek vendi i ngjarjes në fshatin Zvirinë të Maliqit, aty ku mendohet se dhe janë ekzekutuar.
Policia ka shoqëruar disa persona nga Pogradeci dhe Maliqi, por deri tani grupi i hetimit nuk ka shkuar tek autorët.
Andrea dhe Martin Olldashi, 33 dhe 31 vjeç, u gjetën të mbuluar në kanal, ndërsa policia tha se ata ishin ekzekutuar me armë zjarri.
Trupat e pajetë të viktimave u gjetën në afërsi të vendit të quajtur Kisha e Vogël, në fshatin Zvirinë. Dy vëllezërit ishin larguar nga banesa prej datës 7 dhjetor, ndërsa nëna e tyre kishte denoncuar një ditë më vonë mungesën e kontaktit me ta. Vëllezërit ishin fëmijët e vetëm të familjes Olldashi, dhe banonin në lagjen 1 të Pogradecit.
Ata kanë pasur më herët probleme me policinë, dhe ishin akuzuar si autorë të shpërthimit me tritol të lokalit në pronësi të një ish futbollisti në vitin 2012 në Pogradec, por edhe për gjobëvënie, vjedhje dhe vepra të tjera penale.
