Shefi i Organizimit i Partisë Demokratike, Klevis Balliu, ka zbuluar hapat e radhës që do të ndjekë selia blu për t’u përballur me qeverinë e Edi Ramës. I ftuar në rubrikën “Opinion” në News 24, ai tha se protestat do të jenë në të gjitha format në të gjithë vendin.
“Protestat do të jenë në të gjitha format, në të gjithë vendin. Këtu nuk është çështja se ç’a do bëjë PD-ja, por çfarë do bëjmë të gjithë bashkë. Cënimi i fjalës së lirë, zërit ndryshe, cenimi i xhepit të shqiptarëve. Çmimi i naftës vazhdon të rritet. Varfëria po tejkalon limitet.
Rrogat dhe pensionet nuk rriten, rinia po ikën në emigrim sepse nuk shohin shpresë. Po ikin të rinjtë me gomone. Ky është realiteti shqiptar, ndaj në këtë kontekst cënohet gjithçka. Nuk është çështja ç’do bëj unë apo ju. Mund të jesh i majtë, i djathtë dhe pa asnjë bindje politike, por sot është koha që shqiptarët të tregojnë se dinë të dallojnë të mirën nga e keqja”, tha ai.
Dje, gjatë një takimi me fermerët, kryetari i Partisë Demokratike, Sali Berisha, bëri thirrje për protesta. Berisha tha se nëse ne nuk e largojnë këtë qeveri sa më shpejt, në mbledhjen tjetër nuk do të bëjmë gjë tjetër, veçse të vajtojnë më shumë. “Nëse ne nuk e largojmë këtë qeveri sa më shpejt, në mbledhjen tjetër nuk do të bëjmë gjë tjetër veçse të vajtojmë më shumë se kaq. Ndaj duhet të ngrihemi.
Sot janë me dhjetëra e mijëra biznese që po shkojnë drejt falimentimit, po ulin qepenat. Sot janë dhjetëra e mijëra fermerë që po shkojnë drejt falimentimit. Ka vetëm një rrugë, protestë dhe vetëm protestë, ta largojmë. Kjo është një qeveri që nuk përfill qytetarët shqiptarë. Ju e thatë bukur këtu, as na ka pyetur.
Cilido që të pyesësh, a ju ka pyetur kush për këtë ligj apo këtë vendim. Absolutisht jo! Asnjëherë! Ky vend nuk ka pasur asnjëherë kryeministër më të dobët se ky njeri. Ky, përveçse mashtron çdo ditë, përveçse tregon cinizëm dhe shpërfillje, nuk pasqyron as nocionet më elementare të dijes në një fushë të caktuar.
Thotë bujqësia po ecën shumë mirë, po përfiton bujqësia nga ‘Ballkani i Hapur’, turizmi është më i përsosur…turizmi është në terr. Rendi i shkëlqyer… çdo ditë vriten dhe përgjaken vendet tona. Të ngrihemi sepse jemi në rrezik të madh, në rrezik të vërtetë ekzistencial. Një komb që në 6 vite largohen 744 mijë qytetarë. Unë kam besim se me vullnet, me guxim dhe me vendosmëri ne do t’i tregojmë vendin kësaj qeverie dhe ju garantoj se do realizojmë plotësisht të gjitha projektet dhe platformat për bujqësinë”, theksoi Berisha.
