Një ngjarje e rëndë ndodhi mbrëmjen e djeshme në Vlorë, ku nipi vrau xhaxhain e më pas veten. Krimi i dyfishtë është regjistruar në fshatin Mekat të Vlorës, e ndërsa viktimat janë identifikuar si Genci Koreta, 39 vjeç (nipi) dhe xhaxhai Jorgji Koreta, 64 vjeç. I riu i cili dyshohet se vuante nga depresioni, ka qëlluar me armë gjahu xhaxhanë, teksa po punonin në ullishte.
Zbardhet dinamika paraprake e ngjarjes
Jorgji Koreta jetonte prej vitesh në Vlorë, por kishte tokat me ullinj në fshatin Mekat. Dje ai kishte udhëtuar nga Vlora drejt Mekatit, për të vjelë ullinjtë së bashku me nipin e tij Gencin në tokën që ndodhej pranë shtëpisë se Genci Koretës, që është edhe autori i ngjarjes.
Zënka për rrënjët me ullinj
Motivet e krimit janë ende të paqarta, por besohet se janë zënë për rrënjët me ullinj. Një debat i filluar mes fjalëve, konfrontimit fizik mes tyre dhe më pas përdorimit të armës së gjahut.
I nxehur dhe në gjendje të rënduar psikologjike, Genci është kthyer në banesë siç tregojnë edhe familjarët, dhe ka marrë armën e gjahut. Eshtë rikthyer tek toka dhe ka goditur në drejtim të tij me një plumb i cili e ka kap të ndjerin në pjesën e kokës. Disa metra më tutje ka goditur veten në kokë. Arma e gjahut ishte pa leje përdorimi nga Genci Koreta, armë me të cilën ka shtënë vetëm dy herë pasi aq fishekë ka patur.
