Zbardhet kërkesa e mazhorancës për Komisionin e Venecias, sa i takon shkarkimit të Presidentit Ilir Meta nga detyra. Gazeta e tregoi pak ditë më parë se futja në lojë e Venecias e zvarrit procesin, por nëse Komisioni mbështet argumentet e mazhorancës socialiste, atëherë edhe shkarkimi i Metës nga Gjykata Kushtetuese është i sigurt.
Kështu, në letrën e firmosur nga kreu i Kuvendit, Gramoz Ruçi fillimisht bëhet një përmbledhje e të gjithë situatës që nga caktimi i datës së zgjedhjeve nga kreu i shtetit, djegia e mandateve të opozitës, zëvendësimi i deputetëve, mosregjistrimi i LSI-së e PD-së ne zgjedhje, djegia e KAZ-ve në bashkitë jo socialiste, zhvillimi i procesit elektoral pa incidente dhe deri te ngritja e Komisionit Hetimor për shkarkimin e Presidentit.
Ndërkohë që, më pas në mënyrë kronologjike radhiten edhe 8 pyetjet që deputetët e drejtuar nga Ulsi Manja, kanë përgatitur për Venecian. Së pari, kërkohet sqarim për rolin e Presidentit në proceset zgjedhore. “Roli i Presidentit në proceset zgjedhore, në regjimet parlamentare si Shqipëria, në raport me pushtetet e tjera?”, thuhet në pyetjen e parë.
Po ashtu, në letrën e firmosur nga kryeparlamentari Ruçi kërkohet mendim nga Venecia se a cenohet siguria kushtetuese, nga anulimi i datës së zgjedhjeve dhe caktimi i një date tjetër, në një kohë që Komisioni Qendror i Zgjedhjeve kishte nisur punën. “A cenohen parimet e së drejtës për të zgjedhur dhe të sigurisë kushtetuese, nga anulimi i datës së zgjedhjeve dhe caktimi i një date tjetër nga Presidenti kur organet e administrimit të zgjedhjeve kanë nisur punën?”, thuhet në kërkesën e mazhorancës për Venecian.
PS kërkon nga Venecia përgjigje për 2 dekretet
Një tjetër pyetje për të cilën mazhoranca kërkon nga Komisioni i Venecias përgjigje është se a mund të quhen 2 dekretet e fundit të Presidentit Ilir Meta si ndërhyrje në procesin zgjedhor, duke cenuar të drejtën e subjekteve për të konkurruar në mënyrë të barabartë dhe të lirë. Ndërkohë që, një tjetër pyetje që ngrihet ka të bëjë me sigurinë juridike të zgjedhjeve.
“A kemi ndërhyrje të Presidentit të Republikës në procesin zgjedhor, duke cenuar të drejtën e subjekteve zgjedhore për të konkurruar në mënyrë të barabartë dhe të lirë? A e respekton parimin e periodicitetit të zgjedhjeve dekreti për anulimin e 30 Qershorit 2019? A konsiderohet cenim i sigurisë juridike ndryshimi i datës së zgjedhjes? A lidhet cenimi i sigurisë juridike me pasojat që vijnë apo mjafton shkelja e parashikimeve kushtetuese dhe cenimi konsiderohet i kryer?”, thuhet në letrën e Partisë Socialiste drejtuar Komisionit të Venecias.
Në përfundim të letrës së firmosur nga kreu i Kuvendit, Gramoz Ruçi drejtuar Buquicchio kërkohet që mendimi dhe opinioni mbi situatën në Shqipëri të jepet sa më parë, kjo edhe nisur nga fakti se kjo çështje konsiderohet e ndjeshme dhe shumë e rëndësishme për mirëfunksioninim e demokracisë në Shqipëri. Për këto pyetje gjasat janë që të merret përgjigje në tetor, kur është sesioni i radhës i punimeve të Komisionit të Venecias, ose në të kundër në dhjetor kur është edhe mbledhja e fundit e komisionit për këtë vit./Gazeta SOT
