Policia duket se është drejt finalizimit të rastit, ku iu bë atentat në qëndër të Tiranës shtetasit Preng Gjini. Policia dhe Prokuroria e Tiranës, thuajse kanë zbardhur të gjithë dinamikën e këtij krimi të rëndë.
Një nga autorët është identifikuar dhe pritet që në ditët në vijim të ndërhyhet, me qëllim arrestimin. Personi i identifikuar është një nga djemtë e vëllait të Kastriot Reçit, i cili mbeti i vrarë me snajper, në janar 2020 në qendër të Rrëshenit.
Ai është pikërisht një nga nipat e Kastriot Reçit, me inicialet A. Reçi. Ky i fundit ka qenë pikërisht në vendin e ngjarjes, ku ka qëndruar në lokal shumë pranë urrës së Nisharakut, dhe prej andej mësohet se është personi që ka aktivizuar lëndën shpërthyese.
A.Reçi, ka qëndruar në lokal dhe i është prezantuar kamarierit si shtetas italian, duke komunikuar me të në italisht. Më tej ka paguar dhe gjatë këtij momenti mësohet se e ka pyetur kamarierin se nga cila ana e qytetit binte “Rruga e Elbasanit”.
E gjithë kjo skenë është filmuar nga kamerat e sigurisë së lokalit, ku A.Reçi, shfaqet me pantallona treçerekshe, me kapele, me flokë të gjata dhe në shpinë mbante një çantë ngjyrë kafe.
