Pasi negociatat për Shqipërinë dështuan, kryeministri Edi Rama dhe ministri i Jashtëm në detyrë, Gent Cakaj do të dalin në një konferencë të përbashkët për shtyp, në orën 17:00.
Këshilli Europian nuk arriti një vendim në favor të Shqipërisë dhe Maqedonisë së Veriut, për hapjen e bisedimeve për anëtarësim. Kjo u bë e ditur nga Komisioneri për Zgjerimin, Johannes Hahn, përmes një postimi në Twitter.
Pas këtij vendimi, kryeministri i Maqedonisë Veriore, Zoran Zaev, ka dhënë dorëheqjen. Lajmi raportohet nga media italiane “Ansa”, ku thuhet se dorëheqja e Zaev konfirmohet nga burime diplomatike në Samitin e BE-së.
Shtetet anëtare nuk kanë arritur një marrëveshje, për të filluar negociatat e pranimit me Maqedoninë Veriore dhe Shqipërinë. Nga ana tjetër, kryeministri Rama dhe Ministri i Jashtëm, Gent Cakaj, kanë bërë lëvizjen e menjëhershme.
Kryeministri Edi Rama ka paralajmëruar një konferencë me gazetarët, sot në orën 17:00. Së bashku me ministrin në detyrë për Europën dhe Punët e Jashtme, Gent Cakaj, shefi i qeverisë do të flasin për negociatat. “Ne orën 17.00 në Kryeministri – konferencë për shtyp me gazetarët e kryeministrit Rama dhe ministrit në detyre për Europën dhe Punët e Jashtme, Cakaj”, njofton Kryeministria.
