Autori dhe moderatori i emisionit “Të Paekspozuar”, Ylli Rakipi, në studion e RTV Ora ka konfirmuar zyrtarisht se është mbyllur emisioni i tij dhe i Adi Krastës, të transmetuar në tv News 24. Rakipi shënjestron kryeministrin Rama, si përgjegjësin e vetëm që ka ndërmarrë këtë akt.
Rakipi thotë se Rama po instalon një regjim diktatorial. Më tej ai sqaroi se kontrata është ndërprerë, pasi mbaronte në gusht të vitit 2020. Po kështu, Ylli Rakipi ka zbuluar se kur nisën konfliktet me kryeministrin, ku pretendon se është hakmarrë në këtë formë. Gazetari tha se problemet u shtuan kur u publikua skandali me tenderin e ‘Unazës së Re’.
Ylli Rakipi: “Emisionet janë mbyllur. Ky nuk është abuzim, ju e dini, e keni mësuar. Mësojeni dhe nga unë. Në fakt unë kam vendosur të them dy fjalë sot. Sepse një kategori njerëzish, e vogël, por dhe ndonjë koleg i yni, afër dhe larg meje, kërkon ta çojë këtë problem tek programacioni dhe tek ideja që gjëra të tilla ndodhin në mënyrë të rëndomtë. Përpiqen ta çojnë tek pronarët. Shqipëria po shkon në një regjim të plotë. Po instalohet një regjim i plotë me një kryeministër që ka staturën e një diktatori, autokrati”, u shpreh Rakipi ne intervistën me Beti Njuma në studion e RTV Ora.
Beti Njuma: Është e vërtetë që keni pasur edhe një vit kontratë?
Ylli Rakipi: Kontrata ime është prerë në mes. Mbaronte në gusht të 2020. Po kjo nuk përbën ndonjë element shumë të rëndësishëm, por unë në emisionin tim përgjatë transmetimit të tij, kam pasur problematika të mëdha me qeverinë dhe z. Rama. Mund t’ju sjell plot materiale filmike, ku në tryezë kam pasur kryeministrin Rama, dhe ai bën presion për intervistën me të dhe i thotë ik pir…
Beti Njuma: Kur nisën problemet?
Ylli Rakipi: Problemet reale u shumëfishuan kur u publikua skandali me tenderin e Unazës së Re. Problemet reale nisën pas një interviste që unë bëra me kryeministrin Edi Rama në zgjedhjet e kaluara. Ishte një intervistë shumë e vështirë, dhe që aty Edi Rama mori vendimet e tij. Dhe vendimi i parë ishte urdhri i prerë që askush të mos marrin pjesë në emisionin “Të Paekspozuarit”. Nuk ka rast në botë kur shefi i propagandës së kryeministrit të marrë masa se kush shkon në emision. Mua më ka llogaritur si Kadriun e parë. Këtë gjuhë bullizmi, fyerje është vështirë të gjesh tek diktatorë të klasit të lartë.
