Presidenti i Kinës, Xi Jinping, të mërkurën e përgëzoi presidentin e zgjedhur amerikan, Joe Biden për fitoren e tij në zgjedhje.
Në telegramin e tij, Xi tha se të dyja vendet nuk duhet të përfshihen në asnjë konflikt ose konfrontim, por në respekt të ndërsjellë, dhe në frymën e bashkëpunimit fitimprurës dypalësh, në mënyrë që të promovojnë paqen dhe zhvillimin në botë.
Presidenti kinez i dërgoi mesazhin e urimit Bidenit dy javë më vonë se disa vende të tjera të mëdha.
Nënpresidenti kinez, Wang Qishan, gjithashtu i dërgoi një mesazh urimi, Kamala Harris, për zgjedhjen e saj si nënpresidente e SHBA-së, njoftoi agjencia e lajmeve Xinhua.
Marrëdhëniet SHBA-Kinë kanë arritur nivelet më të këqija në muajt e fundit, pasi dy superfuqitë kanë shkëmbyer akuza mbi një sërë çështjesh përfshirë luftën tregtare, akuzat e spiunazhit, të drejtat e njeriut, liritë e medias dhe rivalitetin në fushën e teknologjisë.
