Moderatorja Xhemi Shehu është rikthyer në “Portokalli”, ndërsa ndodhet krahë Salsanos por edhe Fjoralba Ponarit. E pyetur mëngjesin e sotëm në “Wake Up” për bashkëpunimin me këtë të fundit, moderatorja tha se mes tyre nuk ka asnjë rivalitet dhe se është me fat që moderon krah saj. Xhemi u shpreh se nuk e kishte menduar rikthimin, dhe se tashmë i duhet pak punë intensive pas dy vitesh shkëputje.
“Rikthimi im në “Portokalli” është si taman një histori dashurie nga këto që zihesh, ndahesh dhe bashkohesh prapë se të merr malli se nuk shkëputesh dot.
Është e pabesueshme, unë nuk e dija që do rikthehesha. Nuk e mendoja këtë rikthimin. Madje kisha menduar se isha shkëputur përfundimisht nga ekrani. U futa pak në shina me “Qesh mirë kush qesh i fundit”, por ai ishte një format i shkurtër.
Mendoj se nuk më janë ndezur mirë motorët se pas dy vitesh shkëputje duhet pak punë. Por, ndjesia ime është sikur nuk jam shkëputur asnjëherë, duke qenë se edhe me kolegët kam pasur kontakte. Në fakt Salsano u bë shkak i rikthimit. Ai realizoi një takim mes meje dhe drejtuesve, dhe ramë dakord për një rikthim”.
E pyetur për Fjoralbën, Xhemi tha se ndjehet mjaftë mirë krahë saj, e ndërsa shprehu konsideratat për të duke thënë se është mjaft e talentuar.
“Fjoralbën e njoh që te “E diell”. Më bëhet shumë qejfi që do punojmë bashkë. Kam konsideratat më të larta. Përveçse është e talentuar dhe duket sikur ka një jetë që e bën “Portokalli”, është njeri shumë i mirë dhe sot vuan për njerëz të mirë dhe jam me fat që punoj me të. Nuk e shohim njëra-tjetrën si rivale”, deklaroi Xhemi.
