Kryetari i Bashkisë së Kamzës Xhelal Mziu mbrëmjen e kaluar në emisionin “Të paekspozuarit” ka deklaruar se nuk do të dalë nga zyra e tij edhe sikur këtë t’ia kërkojë Kreu i PD-së Lulzim Basha. Mziu ka theksuar se ai njeh vetëm dekretin e Metës që zgjedhjet të mbahen më datën 13 tetor dhe sipas tij kandidati i PS-së Rakip Suli para se të hyjë në zyrën e Bashkisë së Kamzës do duhet që të përballet me qytetarët.
Pjesë nga biseda:
Ylli Rakipi: Çfarë do të bëni kur Rakip Suli të vijë në zyrën tuaj?
Xhelal Mziu: E ka të pamundur për të ardhur, sepse ka një dekret që zgjedhjet janë në 13 tetor.
Ylli Rakipi: Rakip Suli vjen me 200 policë.
Xhelal Mziu: Kamza është më shumë se sa 200 policë. Ka mbi 150 mijë banorë. Ne jemi në zbatim të dekretit, për të ruajtur zgjedhjet pluraliste. Nuk do të ketë asnjë person që të shkojë në një bashki, që ka marrë vetëm 6% vota.
Ylli Rakipi: Nëse Rakipi shfaqet atje, ju do ta pengoni?
Xhelal Mziu: Rolin e kryetarit të Bashkisë nuk mund ta luajë.
Ylli Rakipi: Po sikur të vijnë njerëz të BE-së dhe SHBA-së?
Xhelal Mziu: Besoj edhe ata e kanë parë farsën elektorale. Mjafton të shohësh raportin e OSBE/ODHIR. Përfaqësuesit e Këshillit të Evropës për herë të parë nuk monitorojnë zgjedhjet.
Ylli Rakipi: Po sikur të thotë Basha, Xhelal tërhiqu?
Xhelal Mziu: Unë apo kolegët e mi nuk jemi të lidhur me karrigen. Ne zbatojmë ligjin. Vetëm ligji më kthen pas. As vendime politike të cilat janë në shkelje të ligjit.
Ylli Rakipi: Pra, edhe me një urdhër të Bashës, ti nuk do dalësh nga zyra?
Xhelal Mziu: Po, nuk dal.
