Ministrja Elisa Spiropali duket se ka marrë në dorë ‘frerët’ e Tiranës, dhe ka shpallur fitoren e së majtës për një mandat të tretë me kryeministër Ramën. Ministrja e Shtetit për Marrëdhëniet me Parlamentin, Elisa Spiropali, e entuziasmuar thotë se në Kamëz është vulosur fitorja historike për mandatin e tretë të PS me kryeministër Ramën.
Po kështu ajo shton më tej se Kamza është dëshmi e gjallë, se si qeverisin socialistët në krahasim me kundërshtarët. Partia Socialiste ka nisur “de facto” fushatën zgjedhore për zgjedhjet parlamentare të vitit 2021, ndërkohë që paralelisht edhe opozita joparlamentare e drejtuar nga Partia Demokratike dhe Lëvizja Socialiste për Integrim ka ndezur motorët për këto zgjedhje.
Statusi
Në #KAMËZ vuloset fitorja historike e #QarkutTiranë për mandatin e tretë të Partisë Socialiste me Kryeministër Edi Ramën.
Kamza është dëshmi e gjallë se si qeverisim ne në krahasim me kundërshtarët. Për ta, Kamza ishte një geto-bastion. Për ne është një qytet me të ardhme.
Bashkë me Rakipin dhe Eljon, vizituam një pjesë të vogël të investimeve të mëdha në Kamëz.
Rikualifikim urban i bllokut në qendër të Kamzës si dhe kantierët e #Rindërtimit të shkollës ‘Halit Coka’ në Bathore dhe kopshtit ‘Lidhja e Prizrenit’ në Paskuqan janë vetëm disa nga punët moderne dhe transformuese që po përvijojnë në këtë zonë.
Në total janë plot 20 shkolla dhe kopshte të cilat do t’i shtohen infrastrukturë cilësore arsimore dhe do të mirëpresin me qindra fëmijë e nxënës të Kamzës.
Për Kamzën qeveria dhe bashkia po investojnë më shumë seç është investuar në 30 vite. Të bindur se të rinjtë dhe fëmijët e Kamzës meritojnë një të ardhme më të mirë, ngritur edhe mbi sakrificën e prindërve të tyre.
