Presidenti i Serbisë, Aleksandër Vuçiç është shprehur në një intervistë se Serbia do të anëtarësohej në Bashkimin Evropian në vitin 2022 nëse çështja e Kosovës do të ishte kusht për anëtarësimin e Serbisë.
Vuçiç tha në një intervistë për televizionin “Happy” të Serbisë se ai nuk është shumë optimist për zgjidhjen e problemit me Kosovën, megjithatë nga ana tjetër tha se do të jepte gjithçka që Serbia të përfitonte sa më shumë, edhe pse ky sipas tij do të shënonte fundin e karrierës së tij politike.
“Nëse çështja e Kosovës do të ishte kusht për anëtarësimin e vendit të tij në BE, anëtarësimi i Serbisë do të mund të ndodhte më 2023, por nuk do të përjashtoja as vitin 2022. Nuk jam optimist për çështjen e zgjidhjes së [problemit të] Kosovës, sepse shoh se si në Prishtinë mendojnë e veprojnë, por njëkohësisht edhe në Serbi ka njerëz që ende ëndërrojnë mite.
A jam optimist i madh? Jo, nuk jam. A do të jap gjithçka nga vetja që të shohim në mënyrë racionale se çka mund të përfitojmë më së shumti e çka të humbim më së paku? Do të jap gjithçka nga vetja, edhe pse do ta di se ky do të ishte fundi i karrierës sime politike”, ka thënë Vuçiç duke shtuar se në kuadër të dialogut të brendshëm për Kosovën do të tregojë se çka mendon ai se do të ishte zgjidhje.
Po ashtu, Vuçiç ka thënë se Kosova nuk mund të bëhet pjesë e OBK-së në kushtet e tanishme dhe polarizimin politik dhe siç ka thënë ekzistencës së botës multipolare, shkruan Happy Tv, përcjell Klan Kosova.
Vuçiç ka folur edhe për takimin që e ka zhvilluar me zyrtarin e lartë amerikan, tashmë ambasador në Maqedoni, Brian Hoyt Yee, teksa tha se kanë zhvilluar një bisedë të vështirë për Kosovën.
“Kemi zhvilluar një bisedë të rëndë. Ka qenë brutalisht i qartë dhe e ka përcjellë qëndrimin e administratës së tij. Më ka thënë që të mos mendojmë për ndryshim kufijsh, e unë i kam thënë – juve ju ka rënë ndër mend të ndryshoni kufijtë para nëntë vjetësh. Haptas i ka paraqitur qëndrimet anti-ruse, ndërsa unë i kam thënë se qëndrojmë në rrugën tonë evropiane dhe këto ua kam thënë edhe Putinit e Llavrovit”, deklaroi kreu i shtetit serb, Vuçiç.
