Dhjetëra vaksina kundër COVID-19 janë në faza të ndryshme të testimit në gjithë botën. Serbia është ndër vendet që ka shifra të frikshme të të infektuarve, por presidenti Aleksandar Vuçiç ka shtuar shpresat se së shpejti do të kenë në gjendje një vaksinë.
Presidenti i Serbisë ka deklaruar se po zhvillojnë bisedime me një vend, që siç tha, e ka përfunduar vaksinën ndaj COVID-19, dhe që “ua jep atë popullatave të rrezikuara”.
“Shpresojmë se para fundit të vitit, mund ta kemi atë vaksinë. Do të ishte shpëtim për Serbinë dhe ekonominë tonë”, tha Vuçiç, raporton Shërbimi i Ballkanit i Radios Evropa e Lirë.
Por Vuçiç e ka lënë enigmë, ndërsa nuk ka zbuluar se për kë vend bëhet fjalë. “Së shpejti do ta nënshkruajmë protokollin për bashkëpunim, por nuk mund t’ju them se cili vend është”, tha Vuçiç, duke iu përgjigjur gazetarëve në Beograd.
“Do të shohim që Serbia të jetë ndër 30 vendet e para që do ta marrë atë vaksinë”, shtoi ai.
