Gjykata e Apelit Vlorë ka lënë në fuqi dënimin “burgim i përjetshëm” për Gazmend Musta. Ky i fundit në 2 janar të vitit 2019, i mori jetën gruas dhe kunatës e tij. Gjykata e Fierit kishte dhënë vendim për “burg përjetë”. Vendim ky i lënë në fuqi nga Gjykata e Apelit Vlorë.
Në janar të vitit 2019, Musta deklaroi se vrau gruan, pasi ajo e kishte kishte ofenduar. “Gruan e godita me thikë, sepse më ofendoi. S’duroja më”, tha Musta para togave të zeza.
Debati ka nisur gjatë drekës së 2 janarit, ku e ftuar ishte edhe 18-vjeçarja Merisa Caushi. Gentiana ka kërkuar që të shkojë për vizitë tek prindërit, të cilët jetonin në fshatin Drizar, por këtu ka ndeshur në kundërshtimin e bashkëshortit të saj.
Pas debateve me bashkëshortin, ajo është shprehur se do të merrte fëmijët dhe do të shkonte vetë në fshat. Kjo gjë ka zemëruar së tepërmi Gazmendin, i cili ka thënë se ai ishte burri i shtëpisë dhe vendoste ai se çfarë do të bëhej. Fill pas sherrit, ka rrëmbyer thikën dhe ka goditur bashkëshorten, ndërsa motra e saj ka ndërhyrë për ta ndihmuar, por edhe ajo ka rënë pre e sulmit.
Gjatë seancës, ai tregoi se e kishte kryer krimin në familje në gjaknxehtësi e sipër, pas një debati me bashkëshorten, e cila kishte kërkuar të shkonte për vizite tek prindërit e saj në fshatin Drizar.
