Peja u trondit mbrëmjen e djeshme nga vrasja e dyfishtë e dy zyrtarëve të PDK-së, Astrit Ademaj dhe Blerand Kadriaj. Referuar rastit tragjik në Pejë ku u vranë dy zyrtarë të Partisë Demokratike të Kosovës, policia njofton se hetimet po zhvillohen në disa pista.
Zëdhënësi i Prokurorisë Themelore të Pejës, Shkodran Nikçi, në një konferencë për media tha se aktualisht po vijojnë hetimet, ndaj janë të rezervuar në dhënien e informacioneve pasi rasti është i ndjeshëm dhe mund të dëmtohet procesi i hetimeve.
“Të mërkurën mbrëma, si pasojë e të shtënave me armë, dy persona kanë vdekur dhe një është plagosur. Vendit të ngjarjes i janë përgjigjur njësitet policore dhe prokurorja e Departamentit të Krimeve të Rënda. Sot gjatë ditës kryeprokurori, prokurorja dhe hetuesit policor kanë dalë në vendin e ngjarjes, dhe në mënyrë intensive po zhvillohen hetimet që të zbulohen rrethanat dhe motivet”, u shpreh Nikçi.
“….Në disa pista janë duke u zhvilluar hetimet dhe pasi hetimet të përfundojnë do të dalim me njoftim zyrtar. Derisa të vazhdojnë hetimet, duhet të jemi të rezervuar, pasi është rast i ndjeshëm dhe mund të dëmtohen hetimet”, tha ai.
Kandidati për Kryetar të komunës së Pejës nga radhët e PDK-së, Astrit Ademaj dhe zyrtari i lartë i kësaj partie mbetën mbrëmjen e djeshme të vrarë, pasi qëlluan njëri-tjetrin me armë zjarri.
