Ish-deputetja e Partisë Demokratike, Jorida Tabaku përmes një deklaratë për mediat, ka publikuar videon e një të riu, i cili shprehet se ka marrë kërcënime nga kryetarja e Bashkisë së Rroskovecit, Majlinda Bufi.
Në video dëgjohet teksa thotë se e kanë kërcënuar se do t’i heqin kempin e motrës invalide, në rast se nuk votojnë familjarisht më 30 qershor.
Sipas Tabakut, ka qenë kryetarja e Bashkisë, ajo e cila ka ushtruar presion ndaj qytetarëve me aftësi të kufizuara, ndërsa deklaroi se kryeministri Rama kërkon edhe viktima për të mbajtur në këmbë pushtetin e tij.
“Dhuna shtetërore që klika e Edi Ramës po ushtron ndaj shqiptarëve, për t’i detyruar të marrin pjesë në procesin farsë e të paligjshëm të 30 qershorit nuk po kursen askënd. Jo vetëm dhunë ndaj mësuesve, mjekëve dhe punonjësve të administratës, por dëshpërimi i ka çuar vartësit e Edi Ramës nëpër bashki të ushtrojnë dhunë edhe ndaj më të pambrojturve, ndaj invalidëve. Dëshmitë e familjarëve të tyre provojnë së Majlinda Bufi e Bashkisë së Roskovecit, ka arritur deri aty sa të kërcënojë qytetarë me aftësi të kufizuara për heqje kempi, e vetmja mundësi që shumica e tyre kanë për të mbajtur frymën gjallë. Dëshmia revoltuese sesi regjimi i Edi Ramës është i gatshëm të ndëshkojë për karrigen e tij, me heqjen e bukës së gojës disa fatkeqëve, vjen nga djali i madh i një familjeje pa baba, me 3 djem me shikim të kufizuar dhe me dy vajza me aftësi ndryshe”, deklaroi Tabaku.
