Tre nga drejtuesit e lartë të Lëvizjes Socialiste për Integrim reaguan ashpër për votën e Shqipërisë kundër SHBA-ve në OKB. Nënkryetari i Lëvizjes Socialiste për Integrim, Luan Rama shkruan në Twitter se vota e Shqipërisë u dha në mungesë të plotë transparence, mungesë koordinimi. Luan Rama shkruan se vendimi u mor pa u konsultuar me Kuvendin dhe Presidentin e Republikës, Ilir Meta.
“OKB – Shqipëria voton kundër SHBA ! Mungesë transparence, mungesë koordinimi, vendim i pa konsultuar me Kuvendin dhe Presidentin e Republikës,” deklarata e plotë e Luan Ramës.
Ndërkohë kryetari i grupit parlamentar për LSI-në, Petrit Vasili shkruan se vota e sotme në OKB ishte provë e qartë e një qeverie, që e konsideron Shqipërinë pronë të sajën.
Me anë të një postimi në rrjetin social “Facebook”, Vasili shkruan se “kur është fjala për një propozim që bën Amerika aleati me i çmuar dhe i pazëvendësueshëm i Shqipërisë, kurrë vendimi s’mund të jetë pronë vetëm e qeverive shqiptare cilado qofshin, pasi ky vendim është prone e Shqipërisë dhe shqiptareve kudo qe ata ndodhen dhe duhej konsultuar gjerësisht me ta dhe me SHBA-në vetë.”
Gjithashtu, Vasili shkruan se shumë shtete në botë ishin dhe janë kundër, por falë Amerikës kemi sot realizimin e një sfide madhore dhe të paimagjinueshme kurrë më parë, një Kosovë të pavarur.
Ish-ministrja për Integrimin Evropian dhe Deputetja e LSI-së, Klajda Gjosha thotë se për një çështje me kaq shumë rëndësi, nuk është zhvilluar asnjë lloj konsultimi, as me Kuvendin e Shqipërisë, as me Presidentin e Republikës!
Gjithashtu, Gjosha thekson se vota e Shqipërisë nuk është e një individi, as e një institucioni të vetëm, ajo duhet të ishte një votë që përfaqësonte besimin e qytetarëve shqiptarë!
“Sot është marrë një vendim i rëndësishëm në Asamblenë e OKB-së, ku pjesë e votave kundër Shteteve të Bashkuara të Amerikës mbi statusin e Jerusalemit, ka qenë edhe Shqipëria. Përtej këtij vendimi për të votuar kundër, ajo çka përbën një problem real është që për një çështje me kaq shumë rëndësi, nuk është zhvilluar asnjë lloj konsultimi, as me Kuvendin e Shqipërisë, as me Presidentin e Republikës! Vota e Shqipërisë nuk është e një individi, as e një institucioni të vetëm, ajo duhet të ishte një votë që përfaqësonte besimin e qytetarëve shqiptarë,” deklaroi Gjosha. TIRANA TODAY
