Kryebashkiakja e Shkodrës, Voltana Ademi gjatë protestës marshim që është organizuar nga PD për të bllokuar mitingun e Ramës është shprehur se jemi në një emergjenca kombëtare. Gjatë përplasjes së protestuesve me policinë kanë mbetur të plagosur 3 persona të cilët janë transportuar në spital. Policia ka përdorur gaz lotsjellës.
Ademi është shprehur e bindur se opozita nuk do të lejojë që të zhvillohen zgjedhje më 30 qershor, duke bërë edhe një deklaratë të fortë: ‘Më 1 korrik ose do të jemi të gjithë në burg politik ose do të marrim arratinë. Në një eksod tjetër.’
Ajo u bëri thirrje qytetarëve që të mos përdorin sende të forta, duke ngritur duart lart, një shenjë se ato janë të “pastra”.
“Ne jemi këtu për të thënë që bandat kriminale na kanë vjedhur jetën. Më 1 korrik ose do të jemi të gjithë në burg politik ose do të marrim arratinë. Në një eksod tjetër. Ne nuk jemi këtu për të gjuajtur. Ne jemi me duar të pastra.
Ne jemi në emergjencë kombëtare. Edhe Enver Hoxhës ia ka kaluar kjo qeveria. Krimi ka marrë çdo sektor të jetës tonë. Kemi dalë për të thënë të vërtetën që Rama nuk mund të qëndrojë në krye të shtetit.
Ne kemi dalë të marshojmë në qytetin e Shkodrës. I bëj thirrje qytetarëve të ndershëm, edhe aty që janë pas policisë të veshur me skafandra. Ju nuk mund t’i përdhunoni njerëzit e qytetit të Shkodrës. Nuk kemi ndërmend të largohemi nga qyteti jonë. Jemi larguar një herë dhe jemi kthyer me shpresën për ta ndërtuar Shqipërinë. Ndryshe ose do të jemi të gjithë në burg ose jashtë vendit”, tha Ademi.
