Kryetarja e Bashkisë së Shkodrës, Voltana Ademi i është përgjigjur deklaratave të kryeministrit Rama, ndërsa shkruan se Shkodra nën qeverisjen e saj është përmirësuar shumë.
Përmes një postimi në “Facebook”, Ademi krahason Shkodrën me Vlorën, për të cilën thotë se ka vetëm Lungomarën që përmbytet pas 30 minutash shi.
Ndër të tjera, Ademi tha se qyteti që ajo drejton në 6 vitet e fundit nuk ka marrë fonde, por shton se ia ka dalë me miradministrim e lekëve që grumbullon nga taksat.
“Në qytetin bregdetar, “vepra më e rëndësishme e partisë së Rilindjes” është Lungomare- ja e famshme. Vetëm pak ditë më parë të gjithë shqiptarët, e jo vetëm vlonjatët, e panë se ku kanë shkuar miliona euro investime, pasi disa minuta shi përmbytën të gjithë Lungomare- n. Kjo është prova më e mirë dhe më e qartë se çfarë bëri “Rilindja” për 4 vite në Vlorë.
Shkodra këto 6 vite, nuk ka marrë asnjë investim nga “Rilindja” e Edi Ramës. Kjo është e vërteta që e di Shkodra dhe Shqipëria mbarë. E megjithatë, falë miradministrimit si një familje e madhe, me të ardhurat e vetë qytetarëve, përmes taksave që vazhdojnë të jenë më të ulëtat në vend, kemi investuar në rrugë, trotuare, hapësira të gjelbra, ndriçim, kanale kulluese, qendra shëndetësore, shërbim social, shkolla e ambiente sportive…..
“Rilindja” e ka të vërtetuar me prova, edhe gjyqësore tashmë, se jo vetëm nuk është më e mira por është më e inkriminuara, më e korruptuara dhe hajdutja e zgjedhjeve. Sepse vetëm kështu Edi Rama mund të marrë pushtet, pasi shqiptarët nuk e votojnë. Prandaj largimi i Edi Ramës dhe klikës së tij është prioritet dhe emergjencë kombëtare”, shkruan Ademi.
