Gjykata Penale e Tiranës ka dhënë masën “arrest me burg” për 30-vjeçarin Elis Suçi, i cili vodhi paratë në filialin e postës shqiptare në Kamëz.
Ditë më parë, Suçi në bashkëpunim me Algert Kurtin, vodhi 100 mijë lekë të reja nga posta, duke kërcënuar personelin me armë. Pas vjedhjes ai arriti të arratisej, ndërsa policia e kapi një ditë më pas.
Ndërkohë, Suçi po hetohet nga policia dhe për disa ngjarje të tjera kriminale, ku dyshohet se ai mund të jetë autor i disa vrasjeve, pasi ka punuar si vrasës me pagesë.
Pas arrestimit nga uniformat blu, Suçit iu sekuestruan dhe paratë e grabitura në postë në bashkëpunim me Algert Kurtin, të prangosur pak orë pas ngjarjes.
Elis Suçi u fiksua nga kamerat e sigurisë në zonën ku ndodhi grabitja, teksa largohej me qesen e parave me vete. 30-vjeçari është një emër i njohur për policinë, pasi më herët ka qenë i dënuar për vjedhje. Prej muajsh ai ishte në kërkim, ndërsa në mars të këtij viti teksa policia ishte vënë në ndjekje të tij, ai hapi zjarr në drejtim të uniformave, ç’ka i dha mundësinë për t’u larguar.
