Një familje nga qyteti bregdetar i Vlorës dyshohet të jetë prekur nga koronavirusi.
Sipas BalkanWeb, familja prej 4 anëtarësh i është nënshtruar analizave dhe pritet që në orët në vijim të dalin përgjigjet e tyre.
Bëhet me dije se pjesëtarët e familjes janë gjyshja 77-vjeçare, çifti 69 dhe 50 vjeç, si dhe djali i familjes 24-vjeç. Dyshohet se ata janë infektuar nga nipi i cili më 8 mars kishte ardhur nga Italia.
Aktualisht në këtë qark nuk ka asnjë pacient të konfirmuar me koronavirus. Ndërsa sot u konfirmuan 3 rastet e para në qytetin e Korçës.
Deri më tani koronavirusi ka prekur këto qytete: Tiranën, Durrësin, Elbasanin, Fierin, Lushnjën, Kavajën, Korçën dhe Rrogozhinën.
Në Shqipëri janë konfirmuar 89 raste me koronavirus, ndërsa 2 prej pacientëve kanë ndërruar jetë.
Aktualisht në vend janë tre persona të shëruar nga koronavirusi, pacienti zero dhe dy kontakte të tij.
