Ministri Bledi Çuçi theksoi se vlerësimet e dëmeve që shkaktoi tërmeti i 26 nëntorit u zhvillua në dy faza. E para ishte vlerësimi urgjent në pallatet që mund të shembeshin në çdo moment, ndërsa faza e dytë është punuar për raportin përfundimtar. Ky vlerësim do të paraqitet në Konferencën e Donatorëve.
Në një deklaratë për mediat, drejtuesi qendror i operacionit të emergjencës u shpreh se në bashkëpunim me inxhinierët janë duke përgatitur dosjen e tërmetit për Konferencën që do të mbahet në Tiranë.
“Kemi filluar edhe vlerësimin e dëmeve me një formular të dakordësuar sipas një modeli që të kemi adoptuar bashkë me BE, OKB dhe BB. Kjo do të jetë baza që do të paraqitet në Konferencën e Donatorëve. Në terren janë rreth 300 inxhinierë për banesat e dëmtuara për t’i vlerësuar.
Të gjitha të dhënat transmetohen në bazën qendrore të përpunimit të të dhënave, unë mund ta demonstroj dhe live, që ne në kohë reale shikojmë objektet që janë vlerësuar, por edhe për nivelin e dëmtimit. Deri tani janë shqyrtuar 10914 banesa”, u shpreh Çuçi.
