Vjosa Osmani është emëruar zyrtarisht presidente e Kosovës. Në njoftim për media, thuhet se detyrën e ka marrë nga stafi i Presidencës, e ndërsa do të ketë daljen e saj për media në orën 17:00.
“Në përputhje me obligimet kushtetuese, pas dorëheqjes së presidentit të vendit Hashim Thaçi, Kryetarja e Kuvendit të Kosovës, dr. Vjosa Osmani, sot ka marrë zyrtarisht funksionin e u.d. të presidentes së Kosovës.
Ceremonia e pranim- dorëzimit është bërë në prezencën e stafit të Presidencës dhe kryetares së Kuvendit të Kosovës”, thuhet në njoftim.
Ish-presidentit Hashim Thaçi, i është konfirmuar aktakuza e ngritur nga ana e Gjykatës Speciale.
Thaçi në një konferencë për media bëri të ditur edhe dorëheqjen e tij, pasi siç tha ai, “s’do të lejojë në asnjë rrethanë që para gjyqit të dalë presidenti. Ndaj, për të mbrojtur integritetin e Presidencës së Kosovës dhe shtetit të Kosovës, dha dorëheqjen nga posti.
