Kreu i Grupit Demokrat parlamentar, Myslim Murrizi shprehet se qeveria po e çon vendin drejt një krize të thellë ekonomike, më keq se në ’97.
Gjatë fjalës së tij në Kuvend, Murrizi paralajmëroi revolta të popullit, teksa shtoi se viti ’97 do duket si mjaltë në krahasim me to.
Murrizi përmend edhe faktin se vetëm 88 mijë persona kanë marrë deri tani pagën e luftës, nga 170 mijë që ishin premtuar.
“Sot në Parlament kalojnë disa akte normative por janë në vazhdën e tollovisë që ka ndodhur me tërmetin dhe të famshmin virus që del me urdhër nga Rama. Ministrja e Financës është larguar që të pajisë me vegla aktorët që iu shemb teatri. Do të doja të ishte këtu të më tregonte çfarë bëhet me këto akte? Do shtyjmë thotë këstet e pagimit të tatim fitimit. Ti nuk e di sa do fitojnë këta të shkretët. Bizneset ju dorëzojnë bilanc zonja ministre, mendoni që do kenë fitim ata në fund të vitit? Ju çdo ditë lëshoni xhandarët dhe taksidarët për të gjobitur sipas urdhrit që jep sulltani në darkë. Edhe pse janë mbyllur bizneset i paguajnë faturat afrofe se rrezikojnë punonjësit e OSHEE se i kap virusi.
A e dini se 170 mijë vetëve që ju premtuat pagë vetëm 88 mijë kanë marrë deri tani? 110 mln euro i keni bërë rrush e kumbulla. Mashtroni! Do votoni sot për 174 mln euro, e keni kopsitur para, këtu vini për të marrë vulën se borxhet do i paguajnë fëmijët e shqiptarëve. Di gjë të ministri i tërmetit, tigri i qametit? Keni shkuar deri në 10 mld euro borxhe. Nga 2 mijë euro borxh keni marrë për çdo shqiptar, nga ai që lind në djep e deri te ai në prag vdekje. A keni bërë ndonjë plan për Thumanën Maminasin, Krujën a Fushë-Krujën? Zero. Ju i keni në çadra edhe ata të tërmetit të parë. Keni prish në Durrës pallatet, i keni nxjerrë banorët jashtë, iu keni prerë dritat, shpejt e shpejt se ishin plasarit nja dy suva tjetër priste për tu prish e tjetër prishët ju, se jetonte motra e zv.ministres aty.
Talleni duke thënë dilni në këmbë të hënën, mbylluni të enjten. Dilni të premten me makinë të dielën kyçeni makinën. Shqiptarët po shkojnë drejt një krize të paparë. Në ‘97 e partë çfarë ndodhi! Derti në fund të vitit do mungojnë në buxhet 1 miliard euro. Ju na numëroni si turistë edhe emigrantët që hyjnë. I bie që për 120 ditë gjithë shtretërit të jenë të zënë. Me kë talleni ju? Talleni me shqiptarët dhe fukarallëkun e tyre, talleni se do i jepni pagë lufte, se do i ndërtoni shtëpitë, talleni me sovranitetin e votës të shqiptarëve. Pse druheni dhe keni frikë t’ju shkoni nga afër? Çfarë mëkatesh keni bërë që strukeni si struci, bëni lojë të pistë me njëri- tjetrin veçse doni t’ja fshihni të zgjedhurve shqiptarë të zgjedhurin.
Një ditë qytetarët shqiptarë do vendosin vetë, s’ka për të ardhur më manekin në këtë sallë. Nga halli që i ka zënë shqiptarët nga tërmeti, virusi dhe qameti i qeverive që iu rrinë në kurriz, ju do ju vijë shumë shpejt fundi. Do ju duket ’97 si mjalti! Autostradën e keni me 4 korsi, por do harroni edhe brekë e kanotiere të merrni me vete! Jeni zero para fuqisë së votës, dhëntë zoti shumë shpejt do ta provoni”, tha ai.
