Për të parandaluar virusin që ka prekur Kinën e jo vetëm, vendi ynë ka nisur marrjen e masave. Ministria e Shëndetësisë dhe Mbrojtjes Sociale thotë se vendi është me rrezikshmëri të ulët, për t’u prekur nga korona-virusi i ri.
25 shtetas kinezë i janë nënshtruar kontrolleve në aeroportin e Rinasit, për virusin vdekjeprurës që është përhapur së fundmi në Kinë. Ata kanë rezultuar pa probleme. Mësohet se në këtë aeroport janë shtuar kontrollet për korona-virusin kinez që po përhapet me shpejtësi.
Virusi u lokalizua fillimisht në qytetin e Wuhan në Kinë, saktësisht në një treg që shet shpendë të gjallë, prodhime deti dhe kafshë të egra. Tashmë virusi është përhapur në Japoni, Korenë e Jugut, Tajlandë, Singapor, Tajvan dhe Shtetet e Bashkuara. Ekspertët në vende të tjera si Meksika dhe Arabia Saudite, po vlerësojnë rastet e mundshme. Zyrtarët në Kinë, kanë filluar mbylljen e linjave të transportit për në Wuhan, dhe qytete të tjera të prekura.
