Dje janë konfirmuar dy rastet e para të virusit misterioz kinez në Itali. Menjëherë pasi është bërë konfirmimi i tyre, kryeministri italian ka njoftuar mbylljen e linjave ajrore nga Kina. Edhe pse Conte ka thënë që nuk ka hapësirë për alarm, Italia pritet të marrë një plan masash për të mos lejuar përhapjen e koronavirusit.
Të prekurit nga virusit që janë konfirmuar në Itali janë një çift turistësh kinezë, burrë e grua nga Wuhan, vendi ku ka origjinën virusi. Ata janë izoluar në spitalin Spallanzani në Romë.
“Nuk e gjetëm veten të papërgatitur, Ministri Speranza sapo ka miratuar një urdhër që mbyll trafikun ajror drejt dhe nga Kina. Ne jemi vendi i parë i BE që miraton një masë të tillë paraprake”, tha Conte.
