Gazetarja e njohur investigative, Klodiana Lala deklaroi se telefoni i kryegjyqtares së Elbasanit Enkeleda Kapdeni, mund të jetë hackeruar, dhe se ekziston mundësia që ajo të mos i ketë publikuar videot e veta në rrjetin social, Tik Tok. Deklarata e Lalës u bë ditëne sotme në emisionin ”Pikat mbi i” në News 24.
Lala tha se në reagimin e saj pas ngjarjes, Kapedani është shprehur se nuk ka Tik Tok, dhe shtoi se ditën e djeshme, ka pasur një riaktivizim të adresës në këtë platformë sociale.
Për Lalën, ky fakt mund të ngjallë dyshime se mund të ketë persona të tjerë të implikuar, por përgjigjen duhet ta japin organet e akuzës, pas hetimeve.
Klodiana Lala: ”Zonja Kapedani ka dhënë një shpjegim ditën e djeshme, nuk është bërë publik fakti që ka qenë në ILD dhe ka dhënë shpjegime, duke thënë që nuk i kam publikuar, por kanë qenë në telefonin tim. Inspektori e ka pyetur a jeni e vetëdijshme që nuk lejohen videot brenda gjykatës, nuk ka pasur përgjigje. Pati dy reagime të saj. Zonja fillimisht pretendoi që nuk ka Tik Tok, kur News 24 e pyeti ajo bëri një reagim të detajuar duke kërkuar falje publike. Ditën e djeshme, ka pasur riaktivizim të adresës, nuk dihet nëse bëhet nga persona në fjalë, apo persona të tjerë. Personalisht më ngre dyshimet që këtu mund të ketë persona të tretë që e bënë këtë gjë.
Nëse zonja Kapedani s’i ka publikuar vetë këto video, ajo mund të ketë një problem të personalitetit që i ka publikuar. nëse ajo nuk i ka publikuar vetë, drejtësia të gjej personin, arsyet se përse e ka bërë? Zonja Kapedani ka qëndruar tre orë dje në KLGJ, ky hetim duhet të jetë penal. Nëse dikush ka qenë i interesuar të publikojë këto video, Prokuroria e Përgjithshme, Prokuroria e Posaçme duhet të na japë përgjigje. Pse dhe si u publikuan, këto janë pikëpyetje që ne ngremë.”
Inspektori i Lartë i Drejtësisë Artur Metani, ka dorëzuar ditën e sotme në KLGJ kërkesën për pezullim dhe shkarkim nga detyra të Enkeleda Kapedanit.
Sipas ILD, veprimet e saj diskreditojnë rëndë figurën e gjyqtarit. Kërkesa vjen pas publikimit të disa videove që gjyqtarja kishte publikuar në rrjetin social Tik Tok.
Pak ditë më parë, Kapedani u vu në hetim për disa video që ajo ka bërë nga brenda ambienteve të Gjykatës, të cilat ishin aspak të hijshme për profesionin e saj, dhe në vendin e punës.
