Izolimi dhe mbyllja e kufijve, ka qenë një ndër aspektet më mizore të diktaturës komunistë. Në shumë raste përpjekja për arratisje, sillte dënimin me vdekje, burgimin e autorëve, dhe internimin e gjithë familjarëve të tij. Tej burgjeve formale, vetë Shqipëria ishte një burg i madh. Siç dihet, kufiri u hap vetëm ku u shemb regjimi në fillim të vitit 1991. Por a ka pasur ndonjëherë ndërmend Enver Hoxha të hapte vetë kufijtë?
Pol Miliez, mjeku i njohur francez që vinte personalisht në Shqipëri për të kuruar diktatorin, thotë se po. Në një intervistë të prillit 1985 për një televizion francez, me rastin e vdekjes së Hoxhës, Miliez tha se e pyeti në një rast Enverin se çdo të bënte me shqiptarët. A do të lejoheshin ata një ditë të udhëtonin jashtë vendit, si gjithë të tjerët? “Doktor, unë do t’i mbaj kufijtë mbyllur edhe për disa vjet. Pasi ky vend duhet ndërtuar, dhe ky popull duhet ndërgjegjësuar. Nëse unë do të hap kufijtë, shumica dërmuese do të emigrojë, siç kanë bërë në shekuj…”- ishte përgjigja e Hoxhës. Pra Hoxha e dinte se nëse hapte kufijtë, në vend nuk do të mbetej më këmbë njeriu, dhe regjimi i tij do të shembej brenda pak javësh.
