E njohur ndryshe si “Zonja Vdekje”, Lyudmila Pavlichenko, ishte vetëm 24-vjeçe kur Bashkimi Sovjetik u pushtua befas nga Gjermania naziste. Ajo u caktua filimisht si infermiere për të plagosurit, por e refuzoi atë detyrë, pasi prej vitesh ishte stërvitur në sportin e qitjes. Prandaj u bë pjesë e Divizionit të 25-të të Pushkatarëve.
Beteja e saj e parë e madhe, ishte pranë Odesës në Ukrainë. Fillimisht, do të tronditej nga vdekja e një shoku të ngushtë, Por më pas e mori veten, dhe në ditët që pasuan vrau 36 ushtarë të Vermahtit. Në total do të vriste 309 ushtarë armiq. Gjermanët filluan të dëgjonin për të, dhe nisën të joshnin me oferta, për të dezertuar.
Kur nuk funksionoi, e kërcënuan se do ta vrisnin, dhe do t’ia copëtonin trupin. Pavlichenko u plagos 4 herë në frontin e betejës, por arriti të mbijetojë. Fama e saj u përdor për qellime propagandistike nga autoritetet sovjetike. Në vitin 1942, ato e dërguan për një vizitë në SHBA, ku u prit nga bashkëshortja e presidentit amerikan, Eleanor Roosevelt. Pavlichenko vizitoi edhe Britaninë e Madhe. Ajo u promovua më vonë në gradën e majores, nuk u kthye më në luftë, por u mor me trajnimin e snajperëve sovjetikë. U nderua me medaljet më të larta të nderit në Bashkimin Sovjetik. Vdiq më 1974 në Moskë, në moshën 58-vjeçare.
