Përpikmëria, është një pjesë integrale e kulturës gjermane. Gjermanët mësojnë që të vegjël në shkollë rëndësinë e korrektesës. Një nga mbiemrat e parë që ata mësojnë është pünktlich- i përpiktë. Gjermanët kanë rregulla shumë të rrepta për gati çdo gjë, nga oraret e takimeve, shërbimeve, sistemin e transportit etj. Zakonisht ata i planifikojnë gjërat përpara.
Kjo është arsyeja pse arrijnë në kohë në takime, dhe nganjëherë edhe para kohe. Ata nuk e pëlqejnë pasigurinë, dhe nuk durojnë të presin dikë për një kohë të papërcaktuar. Ndryshe nga disa vende të tjera, në Gjermani ora 8:00, nuk është e njëjtë me 8:01.
Disa njerëz besojnë se moti i ftohtë, që është tipik për Gjermaninë, mund t’i ketë bërë njerëzit më të përpiktë. I ftohti i mban njerëzit në lëvizje, dhe kjo mund ta bëjë të vështirë që dikush të presë jashtë për një kohë të gjatë. Disa studiues besojnë se gjermanët, e morën saktësinë e tyre nga romakët, që kishin rregullat fikse dhe të rrepta. Ndërkohë në shumë vende të tjera, vonesat janë tipike.
Edhe shqiptarët janë një shembull negativ në këtë aspekt. Shumica e tyre i lënë takimet nëpër kafene, për shkak se zakonisht paraqiten shumë vonë në takim. Në shumë raste, ata testojnë deri në limite nervat e njeri-tjetrit.
