Kevin Spacey ka publikuar një tjetër video, të frymëzuar nga personazhi që interpreton në serialin “House of Cards”, ku, duke qëndruar pranë një oxhaku, flet për faktin se është shndërruar në shënjestër të kritikëve.
Kjo është hera e dytë që aktori i madh publikon një video të tillë, pasi e bëri këtë edhe vitin e kaluar për Krishtlindje, ku mbrohej nga akuzat për ngacmim seksual.
Video e vitit të kaluar arriti të merrte 4,5 milion shikime për 24 orë, ndërsa video e këtij viti deri tani nuk ka kaluar pragun e 800 mijë klikimeve.
Aktori flet me tonin e zërit sikur të ishte Frank Underwood, protagonisti i serialit të Netflix “House of Cards”. “Nuk menduat vërtet se do të humbisja mundësinë për t’iu uruar Gëzuar Krishtlindjen, apo jo”, thotë Spacey.
Kjo video titullihet “KTWK”, ose “Kill Them With Kindness” – “Vritini me mirësinë tuaj”.
Spacey flet edhe për shëndetin dhe akuzat që i janë bërë. Aktori u pushua nga puna nga producentët e “House of Cards” para se të nise sezoni i fundit i serialit, shkruan “a2”.
Edhe pse nuk iu përgjigj pyetjeve të CNN në lidhje me akuzat, Spacey e përshkruan vitin 2019 në video si mjaft të mirë, ku “rifitoi shëndetin”.
Ai thotë që në vitin 2020 dëshiron më shumë gjëra të mira në këtë botë. Ndërsa e mbyll videon me shprehjen: “Herën tjetër që dikush bën diçka që juve nuk iu pëlqen, mund të hidheni në sulm. Por edhe mund të vetëpërmbaheni dhe të bëni atë që nuk pritet. Mund t’i vrisni me mirësinë tuaj”.
59-vjeçari u largua totalisht nga skena pas akuzave të para për ngacmime seksuale në vitin 2017. Ai gjithmonë ka thënë se është i pafajshëm. Më vonë, akuzat ndaj tij ranë, duke shmangur dënimin e mundshëm me pesë vite burg.
