Instinkti i prindit është i jashtëzakonshëm, këtë e ka vërtetuar një baba në New York i cili ka ndalur me dorë një shkop bejsbolli i cili po vinte drejt e në fytyrën e djalit të tij. Ai ishte ulur pran dy djemve të tij dhe po shijonin një ndeshje bejsbolli, por ajo që ndodhi mund të kishte shkaktuar një dramë nëse dora e tij nuk do të kishte lëvizur në mënyrë aq të shpejtë.
Gjithçka filloi kur një lojtari i ikën nga dora shkopi i bejsbollit dhe fluturon drejt turmës së tifozëve dhe papritmas drejtimi i tij ishte drejt e në fytyrën e një djaloshi të vogël. Pranë tij ndodhej babai i djalit i cili me një instinkt prej sy shqiponje arrin të ndalë vrullin e shkopit duke shpëtuar dhe djalin e tij.
Të gjithë të pranishmit ishin të mahnitur nga ajo që kishin parë dhe babai “hero” u kthye në qendër të vëmendjes menjëherë në stadium. Por ai as vetë nuk e besonte atë që kishte bërë dhe kërkoi që ta shihte edhe njëherë nga kamerat e stadiumit.
