Duket se Kosova ka ecur me hapa të mëdhenj drejt integrimit teksa ka siguruar tashmë edhe “Po”-në e Gjermanisë për liberalizimin e vizave.
Lajmin e ka dhënë vetë kryeministri i Kosovës, Ramush Haradinaj, i cili zbuloi se ka siguruar mbështetjen e Gjermanisë për liberalizimin, konfirmuar nga vetë ministri i Brendshëm gjerman.
“Ju siguroj një gjë që është me rëndësi ta dini. Në Ministrinë e Punëve të Brendshme të Gjermanisë, ministri ka qenë në oborr, na ka prit, rrugës deri në takim më ka konfirmu dhe na ka dhënë po-në për liberalizimin e vizave. Kjo nuk është një «Po» e analizave apo e mendimeve, është një «po» e njeriut në detyrë që flet në emër të Gjermanisë, e ka dhënë «po» për vizat menjëherë. Pra, kini parasysh se ky është vendimi i Gjermanisë, mos lejoni mos me qenë të informuar. Ai tha po dhe po menjëherë dhe ka kërkuar të caktojë personat përgjegjës me harmonizu anën teknike që kur të merret vendimi nga KE, të mos humbim asnjë ditë. Unë veç i them Kosovës urime liberalizimi, kur i kam thënë Kosovës “urime ushtria”, kanë pas dilema plot a bëhet kjo? Por fakti që ka dalë Sekretari Mattis me të prit para Pentagonit është ditur që është bërë ushtria. Nuk e keqkuptoni pse ua jap këtë simbolikë. Nuk ka askush dilema sa i përket qeverisë së Gjermanisë”, ka thënë Haradinaj.
