Djali i Ragip Hajdinit, e po kështu edhe i vëllai kanë qëndruar në të njëjtën linjë sa i takon arrestimit të tij, lidhur me supergrabitjen e Rinasit.
I biri i Ragipit, Dardan Hajdini, ka deklaruar se ai është i pafajshëm, dhe se nuk ka lidhje me këtë ngjarje kriminale. Në një prononcim për median, ai deklaroi se arrestimi është i padrejtë. “Kemi të ardhura, nuk kemi nevojë të grabisim”, u shpreh Dardan Hajdini.
E ndërsa i vëllai i Ragipit, Mustafa Hajdini, zbuloi se pseudonimi “Daja” nuk qëndron, pasi atë e thërrasin “Gipe”. “Askush nuk e thërriste me emrin “Daja”, nuk e kam dëgjuar kurrë. Atij i thonë “Gipe”, përfundoi Mustafa Hajdini.
Më herët, Hajdini deklaroi se edhe ai thërritet me të njëjtën nofkë, por nuk është “Daja” që po kërkohet nga policia. Sipas tij, ai zotëron edhe pamje filmike që e vërtetojnë këtë.
“Kam njohje me familjen Murataj. Isha në varrimin e Muratajt, kam njohje me vëllain e tij. Por nuk jam unë “Daja” që kërkoni. Kam dëgjuar në media që flitej për një “Daja”, por po të kisha lidhje, nuk rrija këtu. Kam pamjet filmike që nuk isha aty në ditën e grabitjes. Kam qenë duke drekuar me miq të mi”, është shprehur Hajdini.
Ragip Hajdini ka kërkuar dhe një ballafaqim me Alkond Bengasin, për të vërtetuar që nuk është ai personi i dyshuar.
“Dua të ballafaqohem me Bengasin, që më ka identifikuar”, ka thënë Hajdini.