Maqedonia e Veriut po mban sot fazën e dytë të zgjedhjeve të parakohshme parlamentare. Ditën e sotme do të lejohen të votojnë vetëm të burgosurit dhe ata që vuajnë nga sëmundje kronike.
Mirëpo vetëm një ditë para fillimit të votimeve, qindra shqiptarë kanë mbushur rrugët e Shkupit në një manifestim duke mbajtur flamujt kuqezi në duar.
Ky manifestim vjen si një protestë ndaj Zoran Zaev, i cili kandidon sërish për postin e kryeministrit. Pak ditë më parë, një përgjim i tij u publikua në mediat maqedonase ku ai ofendonte shqiptarët.
Gjithashtu ai është shprehur disa herë publikisht kundër faktit, që si kryeministër i Maqedonisë së Veriut të zgjidhet një shqiptar.
Zgjedhjet e parakohshme parlamentare në Maqedoninë e Veriut po zhvillohen, pasi Zaev dha dorëheqjen në muajin tetor të vitit të kaluar, kur vendit fqinj iu mohua hapja e negociatave.
Deri më tani, në krye të Maqedonisë së Veriut ka qëndruar një qeveri e përkohshme teknike.
