https://www.facebook.com/tiranatodaycom/videos/318241251953952/
Protesta të dhunshme përfshinë sot Hamburgun, ndërkohë që zhvillohen punimet e Samitit të G-20-ës.
Autoritetet thanë se protestuesit sulmuan një stacion policie, ndërsa u vunë zjarrin disa makinave policore.
Liderët e G20-ës janë duke diskutuar sot për një tërësi çështjesh, përfshirë tregtinë dhe ndryshimet klimatike.
“Të gjithë i dimë sfidat e mëdha globale dhe të gjithë e dimë presionin e kohës. Prandaj, zgjidhjet shpesh mund të arrihen vetëm nëse jemi të gatshëm të biem në kompromis”, tha kancelarja gjermane, Angela Merkel, si nikoqire e samitit.
Gjatë samitit, presidenti i Shteteve të Bashkuara, Donald Trump, ka takuar presidentin e Rusisë, Vladimir Putin.
Presidenti i Komisionit Evropian, Jean-Claude Juncker, u tha gazetarëve se udhëheqësit botërorë në samit nuk janë “as të verbër, as të shurdhër” ndaj trazirave në rrugët e Hamburgut.
Policia, për të dytën ditë me radhë, ka përdorur topat e ujit kundër protestuesve të dhunshëm.
Gjatë ushtrimit të dhunës dhe përpjekjeve për ta ndalur po ashtu janë plagosur dhjetëra policë dhe protestues anti-kapitalistë.
Rreth 13,000 njerëz kanë protestuar të enjten, përfshirë rreth 1,000 anarkistë të maskuar dhe të veshur në të zeza. Policia tha se pret që rreth 100,000 protestues të mblidhen sot dhe nesër. Autoritetet kanë aktivizuar rreth 20,000 policë për të garantuar siguri.
Bisedimet midis Trumpit dhe Putinit janë të parat sy më sy qëkur presidenti amerikan ka marrë detyrën në muajin janar.
Dy liderët do të përpiqen të qetësojnë raportet e tensionuara dypalëshe për shkak të konflikteve në Siri dhe Ukrainë, si dhe ndërhyrjes së dyshuar të Rusisë në zgjedhjet presidenciale në SHBA.
Trump, vazhdimisht, ka bërë thirrje për përmirësimin e marrëdhënieve me Moskën, edhe pse administrata e tij, publikisht, ka vazhduar presionin mbi Rusinë, për shkak të aneksimit të gadishullit ukrainas të Krimesë dhe mbështetjes për separatistët në lindje të Ukrainës.
Të enjten, në një fjalim në Varshavë, Trump i ka bërë thirrje Rusisë “të ndalojë aktivitetet destabilizuese në Ukrainë dhe gjetkë”, si dhe ka theksuar përkushtimin e Uashingtonit ndaj NATO-s, të cilën Putin, prej kohësh, e akuzon për rritje të tensioneve në lindje të Evropës.
Trump, më herët, e ka vënë në pikëpyetje rëndësinë e NATO-s dhe përkushtimin e Uashingtonit ndaj kësaj aleance.
Presidenti i Këshillit Evropian, Donald Tusk, u tha gazetarëve në Hamburg se fjalët e presidentit amerikan në Varshavë kanë qenë “çuditërisht premtuese”.
“Kemi pritur gjatë t’i dëgjojmë këto fjalë nga presidenti Trump. Por, lind pyetja nëse ato kanë qenë rastësore apo politikë e re”, tha Tusk.
Trump, të enjten, ka takuar edhe kancelaren gjermane, Merkel, me të cilën ka diskutuar për Korenë e Veriut, Ukrainën, Lindjen e Mesme dhe ndryshimet klimatike.
