Kryeministri i Edi Rama është takuar në Trieste me homologun e tij të Maqedonisë, Zoran Zaev. Takimi midis dy liderëve të dy vendeve u realizua për forcimin e miqësisë dhe thellimin e gjithanshëm të bashkëpunimit mes dy vendeve tona. Pas takimit Rama është shprehur se ata lanë pas të shkuarën dhe folën për të ardhmen për hapat që duhet të hedhim për të forcuar marrëdhëniet bilaterale në të gjitha aspektet.
“Nuk ka pasur tensione midis nesh si shtete por ka pasur tensione politike dhe një retorike gati skandaloze brenda Maqedonisë, unë nuk dua të hyjë fare dhe të bëjë komente. Është shumë e thjeshtë sa më e fortë Maqedonia sa më demokratike Maqedonia, sa më e suksesshme Maqedonia aq më e fortë edhe më e mirë Shqipëria sepse në Maqedoni jetojë shqiptarë që janë popullsi shtetformuese dhe sa më mirë të jene ata aq më mirë jemi ne dhe aq më e mirë është e ardhmja për të gjithë.
Kemi folur për të ardhmen nuk jemi marrë me të shkuarën dhe kemi diskutuar për hapat që duhet të hedhim për të forcuar marrëdhëniet bilaterale në të gjitha aspektet. Unë i kam bërë edhe një herë të qartë homologut tim se ne duam suksesin e Maqedonisë në të gjitha aspektet” tha Rama.
Në postimin e tij në Facebook Rama gjithashtu shkruan “me urimin që faqja e re e premtuar nga kryeministri Zaev në marrëdhëniet ndëretnike mes dy popujve që formësojnë Maqedoninë mike, të shkruhet me vepra të prekshme për gjithë shqiptarët, të cilët jetojnë në shtetin fqinj.”
Rama është në Trieste bashkë më liderët e pesë vendeve të tjera të Ballkanit Perëndimor me rastin e konferencës së përvitshme të Procesit të Berlinit. Takimi i sotëm është një mundësi jo vetëm për të diskutuar mbi rrugën e integrimit në Bashkimin Europian, por edhe për të mbyllur plagët e të shkuarës, për t’u bërë bashkë rreth një ideje dhe më e rëndësishmja, për të krijuar një platformë për rritjen ekonomike.
