Instituti i Statistikave ka publikuar raportin “Taksat e Mjedisit në Shqipëri”. Sigurisht publikimi është bërë në formatin për të treguar se kemi përmirësime por me shifrat astronomike nuk mundet që të bëhet shaka. Në raport publikohet se lera e taksave të mjedisit në periudhën 2008 – 2015 është rritur mesatarisht 4,7 %. Në 2015, të ardhurat nga taksat mjedisore arritën në vlerën e rreth 40 miliardë lekë që janë afërsisht 300 milionë euro.
A justifikohen 40 miliardë lekë taksa në vit për mjedisin ku jetojmë dhe mënyrën se si ne i menaxhojmë mbetjet tona?
Publikimi i të dhënave nga Instituti i Statistikave u bë në përmbushje të detyrimeve që rrjedhin nga Sistemi Evropian i Llogarive Ekonomike. Por dikush që ka pak dije në ekonomi kupton se 40 miliardë lekë ose 300 milionë euro janë thuajse 2.8 për qind të PBB-së që shkon si taksë në formën e “taksave mjedisore”. Në qoftë se do të bënim një krahasim me vendet e BE-së do të shihnim që paguajmë më shumë se mesatarja e vendeve që janë amtare të komunitetit. Megjithëse paguajmë kaq shumë para për taksa mjedisore sërish askush nga ne nuk mund të mohojë faktin se mbetemi vendi më i mbushur me plehra urbane dhe me sistemin më të keq të menaxhimit të mbetjeve në kontinent.
Por përse i kemi paguar konkretisht këto taksa?
Nga struktura e të ardhurave të taksave mjedisore për vitin 2015, taksat e energjisë zënë pjesën më të madhe të të ardhurave me 56,64 %, të shoqëruar nga taksat e transportit 39,7 %, taksat e ndotjes me 3,64 % dhe taksat e burimeve natyrore me 0,02 %.
Në vitin 2015, krahasuar më një vit më parë, të ardhurat nga taksat e transportit janë rritur me 5,94 % ndërkohë që të ardhurat nga taksat e energjisë janë ulur me 5,28 % dhe të ardhurat e taksave të ndotjes dhe burimeve natyrore janë ulur me 0,66 %.
Në periudhën 2008-2015, pesha mesatare e të ardhurave nga taksat mjedisore ndaj Prodhimit të Brendshëm Bruto (PBB), është 2,77 %.
Sipas metodologjisë së Bashkimit Europian, klasifikohen si taksa mjedisore taksat mbi konsumin e energjisë, taksat mbi transportin, taksat për ndotjen dhe taksat për shfrytëzimin e burimeve natyrore. Një raport i Eurostat tregon se në 28 vendet anëtare, të ardhurat nga taksat mjedisore në vitin 2015 qenë në raport me Prodhimin e Brendshëm Bruto, më të ulëta se sa në Shqipëri. Europianët paguan 2.4 për qind të PBB-së për taksa mjedisore nga gati 2.8 për qind të paguan shqiptarët.
Megjithatë, pavarësisht taksave krahasimisht më të larta të paguara në emër të mbrojtjes së mjedisit, është fakt i njohur nga të gjithë që Shqipëria është vendi me një krizë të përhershme në menaxhimin e mbetjeve urbane, vendi ku mbetjet shpesh hidhen në lumë dhe përfundojnë në det.
