Kryeministri Edi Rama dhe ministrja e Infrastrukturës, Belinda Balluku, kanë inspektuar ditën e sotme punimet në Bypass-in e Tepelenës.
Kreu i qeverisë e ka cilësuar këtë objekt si një vepër të rëndësishme të infrastrukturës kombëtare, e cila vihet në shërbim të qytetarëve e të sipërmarrjes.
“I trashëguar ndër dekada si një shteg buzë kalasë së Ali Pashës, sot segmenti që lidh dy segmentet e rëndësishme rrugore, Levan-Tepelenë dhe Tepelenë -Gjirokastër-Kakavijë, ofron dhe një panoramë fantastike për udhëtarët, si edhe një hapësirë të re lëvizjeje për këmbësorët, duke e fuqizuar më tej ofertën e Tepelenës turistike”, shkruan Rama në Facebook.
Bashkë me Ramën dhe Ballukun ishte edhe kryetari i Bashkisë së Tepelenës, Tërmet Peçi, i cili prezantoi ecurinë e punimeve.
Peçi tha se Kalaja ka qenë e bllokuar dhe tashmë po zhbllokohet nga të gjitha zaptimet e panevojshme.
“Vitin tjetër besoj Tepelena lidhet me bregun e detit me 80 km”, u shpreh ai, ndërsa fton kryeministrin të shohë punimet.
Rama tha se i ka parë inspektimet në kala, ndërsa Peçi i përgjigjet me të njëjtën shprehje të cilën kryeministri e ka përdoruar në shumë debate politike.
“S’keni parë gjë akoma”, tha Peçi.
“S’kam parë gjë akoma, e”, ia ktheu Rama.
