Një tjetër rast i dhunës së ushtruar nga policia është regjistruar ditën e sotme, në zonën e Astirit në Tiranë.
Një qytetar ka dërguar një video në redaksinë e JOQ Albania, ku shihen dy policë që godasin me shpulla një drejtues mjeti që kanë ndaluar.
Sipas qytetarit që ka dërguar videon, drejtuesi i mjetit ishte duke udhëtuar me familjen e tij dhe nuk dihet shkaku i ndalimit.
Siç shihet në video ai nuk bën rezistencë ndaj policëve, por pavarësisht kësaj ata e qëllojnë të dy me shpulla, ndërsa më pas e shoqërojnë për në automjetin e policisë.
Ky episod dhune vjen vetëm pak ditë pas publikimit të një tjetër videoje, ku policia shfaqej duke ushtruar dhunë ndaj një 15-vjeçari, i cili po lëvizte jashtë orarit të lejuar me biçikletë.
