Kryetari i Bashkisë Lezhë, Pjerin Ndreu ka komentuar debatin e zhvilluar 2 ditë më parë mes ministrit Lleshaj dhe banorëve të një pallati 12 katësh.
Debati nisi si pasojë e ankesave të banorëve të cilët ankoheshin se nuk kishte ardhur asnjë person për inspektimin e objektit. Ndërkohë që ministri Lleshaj i kërkoi që të mos përhapnin panik pasi pallati ndodhej në gjendje të mirë.
Po në këtë objekt jeton edhe kryebashkiaku i Lezhës, emri i të cilit përmendet edhe gjatë debatit. Ky i fundit në një lidhje direkte në emisionin ‘Open’ ka shpjeguar incidentin e ndodhur.
Sipas tij, mendimi i zotërisë që debatoi me ministrin e Brendshëm nuk ishte i pjekur.
“Është Drejtori i Urbanistikës së bashkisë. Është një djalë i shkëlqyer, arkitekt. Ai ka dhënë mendimin e tij aty, nuk ishte mendim që u përkrah dhe nuk ishte mendim i pjekur, ndoshta ambienti ku është thënë nuk ka qenë ambienti i duhur.
Aty ku thotë që e thotë kryetari është në kontekstin që duhet sjellë një grup tjetër për të bërë inspektimet, pasi unë ndodhem aty si kryetar i bashkisë por edhe si banor i pallatit”, tha ai.
Pjerin Ndreu deklaroi se pallati në fjalë është verifikuar se nuk është i rrezikshëm për të banuar.
