Prej ditësh tashmë në mbi 30 qytete në SHBA po zhvillohen protesta masive, pas vrasjes nga policia të një njeriu me ngjyrë.
George Floyd ndërroi jetë në Minneapolis, Minesota, gjatë momentit kur po arrestohej nga policia. Kjo e fundit tha se ai humbi jetën pasi kundërshtoi efektivët e policisë.
Por videot amatore të publikuara më vonë treguan, se ai jo vetëm që nuk po e kundërshtonte policinë, por dhe se ishte trajtuar shumë keq nga ata.
Në video ai dëgjohet të thotë “Nuk marr dot frymë”, shprehje e cila përdoret nga mijëra qytetarë tashmë që protestojnë për këtë kauzë.
Në lidhje me këtë ngjarje, presidenti amerikan Donald Trump ka deklaruar se pajtohet tërësisht me demonstruesit. Njerëz nga të gjitha komunitetet kanë dalë në rrugë, duke protestuar për vrasjen brutale të Floyd. Një sërë objektesh janë djegur në Amerikë prej protestave të dhunshme, ndërsa ka pasur edhe shumë arrestime.
Protestuesit kërkojnë arrestimin e katër policëve që u përfshinë në këtë ngjarje. Në videon e publikuar nga CNN, duket se vetë efektivët e policisë i janë bashkuar kauzës së qytetarëve.
Vrasja dhe keqtrajtimi i njerëzve me ngjyrë nga policët “e bardhë” nuk është një fenomen i rrallë në SHBA, ndërsa protesta të shumta janë zhvilluar ndër vite në lidhje me këtë çështje.
