Nga Anxhela Ferra
Në 3 nëntor të vitit 2018, një pjesë e banorëve të Astirit dolën në rrugë për të protestuar për shtëpitë e tyre. Kjo pasi prekeshin nga projekti për ndërtimin e Unazës së Madhe. Dhe prej atëherë, çdo ditë ata bllokonin të dyja akset në shenjë revolte. Të mbështetur edhe nga opozita e bashkuar.
Të vendosur, ata kanë zhvilluar një nga protestat më afatgjata në vend. Ku për ditë me radhë nuk hoqën dorë për të mbrojtur kauzën e tyre. Por, edhe kauza të tjera. Në protestën e studentëve, ata ishin aty. Në protestat e opozitës, që nga marshimet e deri te tensionet e forta, banorët e Astirit ishin një nga elementët thelbësorë.
Sipas tyre ata nuk janë kundër projektit dhe investimit. Por, kërkojnë dëmshpërblimin në vlerën e tregut. Edhe pse shtëpitë e tyre janë të ndërtuara pa leje. Kjo gjë që prej ditës së parë të protestës, kanë shkaktuar tensione mes vetë banorëve dhe efektive të policisë.
Ndërkohë, që IKMT ka bërë paralajmërimin se sot do të niste aksionin për shembjen e banesave; banorët e Astirit dhe njëherë u ngritën. Kësaj radhe edhe më të revoltuar, pasi “beteja” e tyre jo vetëm që nuk po fitohet, por qeveria është e vendosur të çojë projektin para. Tashmë që është zgjidhur edhe ngërçi i firmave fituese për të tre lotet.
Prej orës 6 të mëngjesit tek “Sheshi Shqiponja” banorët janë përplasur me forcat e policisë. Duke hedhur gurë e bomba molotov në drejtim të efektivëve. Ndërsa këta të fundit i janë përgjigjur me arrestime dhe gaz lotsjellës. Si pasojë mbi 12 persona, mes tyre efektivë policie dhe protestues, morën edhe trajtim mjekësor.
Sipas IKMT-së janë 33 objekte që do të prishen, prej të cilave 21 janë shpronësuar, ndërsa të tjerat janë skualifikuar nga procesi i legalizimit.
Ndërkohë, banorët e Astirit vazhdojnë “betejën” e tyre, të tensionuar, të revoltuar, të qetë, të zhgënjyer, ata thonë se nuk do të heqin dorë. Do të qëndrojnë deri në fund për shtëpitë e tyre. Por, edhe pas më shumë se 1 vit rezistence, sa e fituar është kjo “betejë”?/ TIRANA TODAY
