Përmbytjet kanë prekur shumë familje, duke u shkaktuar një dëm të madh ekonomik brenda pak orësh, por Rajmonda Smoqi ka vetëm një kërkesë: të thellohet shtrati i lumit Erzen e të jetojë e qetë në shtëpinë e saj.
Ajo është nënë e dy fëmijëve, e cila ka braktisur shtëpinë e saj dy katëshe të mbuluar nga uji i lumit Erzen në lagjen “Erzen” në Shijak.
Me zërin që i dridhet dhe me pikëllim të madh në sy, gruaja tregon sesi e braktisi shtëpinë para se uji të hynte në banesë.
Rajmonda thotë se kjo është një situatë që përsëritet çdo vit, që nga 2012-a, ndërsa ndihmat e vetme që ka marrë ndër vite janë disa batanije dhe ushqime.
Megjithatë, ajo thotë sërish se nuk kërkon ndihmë të madhe, e vetmja kërkesë e saj është që të ndërhyhet dhe të thellohet shtrati i lumit Erzen.
Dy ditë më parë nga prurjet e lumit Erzen, tre ura në Shijak janë shembur duke bllokuar tri fshatra, Gjepalaj, Çizmel dhe Shetel. Ndërsa probleme ka edhe në Ballias, pasi janë bllokuar rrugët. Deri tani raportohet se janë përmbytur 50 banesa, 40 familje janë evakuuar, nga shtëpitë e tyre të përmbytura.
