Kryetari i Partisë Konservatore, Kujtim Gjuzi, ka vijuar përplasjet edhe sot gjatë seancës plaenare me kryeparlamentarin, Gramoz Ruçi. Kujtim Gjuzi ka kërkuar që Ruçi t’i japë të drejtën e replikës deputetëve të opozitës së re, ndërkohë që i ka kujtuar se votat e tyre po e mbajnë Parlamentin në ‘këmbë’.
Madje Gjuzi ka shkuar më tej duke kërcënuar Ruçin me mocion shkarkimi. “Duhet te na japësh mundësi për replikë, se unë të bëj mocion për shkarkim. Kujdes z.kryetar”, iu drejtua Gjuzi, kreut të Kuvendit.
“Ke 28 mandate këtu, dhe e mban vendin aty, prandaj herë tjetër, kushdo qe te jetë, nëse kemi një replikë duhet të na lejosh”, u shpreh kreu i Partisë Konservatore.
Por kjo situatë nuk është kapërdirë mjaft lehtë nga Ruçi, i cili i ka kërkuar që të flasë me etikë në Parlament, dhe të vishet sipas rregullores.
“Kujdes z. Gjuzi dhe herë tjetër kur të flasësh, respekto rregulloren dhe të flasësh me etikë, dhe e treta; herë tjetër në Parlament të jesh i veshur sipas Rregullores”, tha më tej ai.
